retold by Alvios William
illustrated by Starla Stone

Mei wor emén kiing aa mén fókkun mwochen chék epwe foutout fansoun meinisin. Iteiten ráán epwe chék sissiiwin úfan nge úfan epwe fókkun ning. Esapw pwan wor emén kiing iká aramas repwe pwan úfeni kireen úfan. Aa fókkun pinefetán pworausan wóón fénú meinisin.

Iwe rúwemén chóón teete úúf raa nónnómw nge raa pwan rong pworausen eei kiing me wóón fénúweer we. Iwe raa pwon fengen pwe repwe nee nó asona ewe kiing pwe repwe teei eew úfan ese wor mwo emén kiing me nón fénúfaan e úfeni esin. Raa makkeei néúúr we taropwe tiinaanó reen ewe kiing.

Ewe kiing aa fókkun pwaapwa iwe aa erá pwe mei fókkun mwúrinné. Repwe teei úfan ewe nge epwe ngeniir ngerewún mwooni pwe néúúr.

"Iei áám úpwe ne teei úfomw eei. Eei úúf aramas mei tipachchem me aramas mei nomw nón wiis tekia nge are pwe iir mei sineei angaangen wiiseer kewe, iir chék repwe toongeni kúna eei úúf. Aramas mei tiparoch me aramas mei nómw nón wiis tekia nge rese weewe ngeni angaangen wiiseer resapw toongeni kúna eei úúf," anoon ekkewe rúwemén chóón teete.

Aa mónetá ruumw neenian ekkewe chóón teete me pisekiir pisekin teete. Iwe, wareto ekkewe chóón teete raa iwe nee pwopwutá nee teei ewe úúf. Aramas raa kan kiito katon teeieer we úúf nge rese mwo kúkkúna ooch mettooch. Nge ate kewe fokkun rese tawe no reen aar we osukosuk. Ese iáán no meet raa fókkun fééri.

Iwe ekkewe aramas rese fókkun kúna mwo ooch mettóóch. Nge pwokiten re sááw iká aramas re era pwe iir mei tiparoch pwún aar we rese kúna ewe úúf, iir meinisin raa kan fókkun chimwechimw nge era, "Mwaa aa feet me ningan eew úúf iei. Pwata si keráán kúna eew úúf mei fókkun ning."

Iwe ekkewe chóón teete fókkun angaangenó chek. Aa máá fen iwe aar we fókkun kitipéppé nge, "Waato enaan, kopwe epweraato óómw na tereet ikaan." Aa máá iwe áán ewe penen aramas we fókkun ingeiti iwe ewe úúf nge ii ese mwo wor mettóóch re kúna. Chómmóng chóówe mei nómw nón wiis tekia raa fókkun kan pworaus fengen neefiineer reen aar fókkun ingeiti ewe úúf. Fókkun kan fééri pwe ekkewe aramas repwe erá pwe iir mei tipáchchem pwan sineei échchú angaangan wiiseer kewe.

Raa kan nó pworauseei ngeni ewe kiing, fééri meet ewe kiing epwe sineei reen pwe iir mei tipáchchem pwan fókkun weeweiti wii-seer kewe pwún iwe iir mei kúna ewe úúf.

Ewe kiing ese chiwen fókkun kinamwmwe reen aan we mwochen kúna úfan we. Iwe, eew ráán aa tiináánó néún we nampa eew tip-áchchem me tekia wiisan me neein néún kewe chóón angaang pwe epwe nó katon aa ifa etikin ewe úúf iká aa wees pwe epwe ne úféúf. Iwe atewe aa no. Ese mwo kúna ooch mettóóch. Iwe aa erá, "Mwaa meet? Pwata ú erá pwe ngaang nampa eew tipáchchem me wóón eei fénú nge Pwata iei úse kúna eei úúf."

"Ke kúna ekkaan péén irá mei unusen koon?" ekkewe chóón teete raa kan ais ngeni, Pwokiten atewe e sááw pwe rete erá pwe ii mei tiparoch, iwe ese pwan naaf ngeni wiisan we wiis tekia me nón neenien ewe kiing we, aa fókkun kan chimweei mekúran nge kan apworaus ngeniir reen aan fókkun ingeiti ewe úúf.

Iwe atewe aa nó aa pwan nó apworausa ngeni ewe kiing.

"Kiing, ennet úfomw naan ese fókkun wor esian me non unusen fénúfaan. Enaan esin kireen úúf úféúfan chék chóón nááng."

Ewe kiing aa fókkun pwaapwaa. Ese chiwen nó pós nee nómw chék nge ais pworausan úfan ewe.

Iwe ekkewe chóón teete raa tiitiinó reen ewe kiing pwe aa wees ewe úúf. Iwe ewe kiing aa appiooni pwe aramas meinisin repwe ne kiito pwe epwe ne úféúf úfan we risikápeepe nge repwe kiito katon. Meinisin ekkewe aramas raa fókkun amweira ewe úúf.

"Aa pi apiipi piapiipi! Aa tuu wááwá tuuwááwá!" ekkewe aramas raa fókkun kan mweiráásini ewe úúf

Kiing aa fókkun pwaapwa. Ese fókkun chiwen wor aan epwe kuum fengen awan reen aan we akkamenimen chék. Ate kewe itá nge raa kan ekieto ewe úúf iwe raa atoononga kiing nón. Iwe ewe kiing aa iwe nee fetán wóón ewe aan nge aramas rese fókkun nó kuch fengen me únúkkún ewe can nee katon. Ewe kiing aa pwereto, pwereto toori awenewenan emén semiriit. Ewe semiriit aa attona, attona ewe kiing iwe aa erá, "Nge kare inaan enaan kiing mei seneenó ese mwo wor úúf wóón!"

Ewe kiing mei rong nge emenúngngawenó chék. Iwe ekkewe aramas meinisin raa fókkun otetá nee takir iwe raa pwúpwpwúchéérútó.

"Eee, ennet mwaken chék enaan úúf. Ennet néúch eei kiing mei seneenó."

Iwe ewe kiing aa fókkun sááw iwe aa era pwe, "Pwaapwa esini meet úkúúkún mettóóch mei wor reei aa mwúrinné seni tipemmóng eiti meet mei watte."