EWE PIIK ME EWE KUNIING

retold by Francis Sain
illustrated by Brad Evans

Aa nónnómw emén piik pwan emén kuniing nón eew samer me wóón eeú fénú me nón pasific. Ewe piik aa nónnómw nón eeú tittin piik. Iteiten ráán ekan mwéngé seni ekkewe aramas raa fóóneni. Fáán ekkóóch ekan mwéngé chék chéé. Are pwe ekkewe aramas raa túmwúnúngngaw rese waato anan epwe chék pwúppwúchéér nón tittin we. Nge aa men mwénge anné me reen ekkewe aramas. Ina pwata aa men mwotoutou, nape kukkumwos pwan máár annim. Ewe piik aa men pwaapwa reen anan mwéngé.

Nge ewe kuniing ekan chék akkásifetán wóón ewe fénú nee kút anan mwéngé. Fáán ekkóóch epwe toongeni pwenni ewe fénú fáán ruu nee kút anan mwéngé. Pwan fáán ekkóóch epwe pwan assito únúkkún ewe tittin piik reen aan epwe pwan kút chék ochaan mwosó. Are pwe aa pwan néúnéú epwe pwan túmúnú néún kewe toori aar repwe toongeni pwisin kút eneer.

Eeú ráán ewe kuniing aa assito únúkkún ewe tittin piik. Ewe piik mei nómw nón ewe tit a kúna ewe kuniing.

"Ráán annim, kuniing, meet ena ke fééri?" Ewe kuniing ese mwo nennengeni pwe aa chék pwórutiw nge chupw ochaan mwosó nón ewe pwún.

"Eei kuniing kose rong, meetena ke kútta?" Kuniing aa "Ráán annim piik. Ómwusanó tipis nge úse rong. Úwaa chék mwééchúúti nee kút ocháái kei mwosó." Ewe kuniing aa pénúweni. "Mwaa meet nge úa fókkun tongeek pwe kaa pekkus nee chupw ochóómw mwosó, nge kose usun ngaang úkan chék mémméúr nge enei mei chék feffeitto. Mwaa meet kaa men fókkun feiééch, piik. Ewe kuniing aa changetá aa kiinenó pwan ekis.

Ewe piik aa nónnómw nón tittin we nge ammen pwaapwa reen aan kuniing we ereni pwe mei fókkun feiééch. Aa ekieki pwe mei pwúng reen ewe kuniing. Ina pwata aa fókkun nikessássáafetán nikessássááfetán me aséasenó. Aa kééúúnó aa kan aséésé, nge kapas chééú, "Mwaa meet mwaa," epwe ia me áái riáfféú me osupwang are pwe iwe usun onowe kuniing nee pwisin kút anan mwéngé.

Pwan eeú raán ewe kuniing aa pwan ássito únúkkún ewe tittin piik. Nge fen sereni atun aan ewe piik aa mwéngé. Ewe piik aa kan mwéngé nge attona ewe kuniing. Ewe kuniing aa chimwetá nge aa weri pwe ewe piik ekan mwéngé nge pwan attona. "Eei piik." Meet ena kekan pwan nengeni?" Ewe kuniing aa eisini ewe piik.  "Ese wor mwaa kuniing, pwe úkan nennengonuk reen áái tongeek, reen óómw riáfféú nee pwúkún kút anomw. Ina pwata aa chúúchúúnó pecheemw kena pwan fetépwúnúpwún awomw." Anoon atewe piik.

Riáfféú Reen meeta? Ina mwo iká pecheei kei mei kichchhúúchú pwan fetépwúnúpwún awei reen áái riáfféún kút enei mwéngé. Nge mei chék pwaapwa neetipei pwe ngaang mei toongeni pwisin kút enei pwan toongeni chuuri chienei. Nge een na ka chék mwéchúnong nón na tit. Kose toongeni chuuri chienomw. Kose toongeni kukkunow fetán wóón eei fénú, kose pwan pwaapwa. Manawomw aa nómw nón péún aramas. Iká re mwochen amwéngéénuk re amwéngéénuk. Are rese mwochen kose toongeni mwéngé.  Nge epwe ia iká raa mwochen ocheek. Repwe chék etto angeeiuk raa niukenó. Ewe kuniing aa apasa nón takir.

Onowe piik aa rong aa men mááirú fiti nóniinen, nge ese wor epwe fééri aa chék mwómwóót nge kekkechiw nón tittin we. Piik aa sinei pwe manawan esapw nemenian pwe ekkewe aramas raa wiisen nemeni.

EKKÓÓCH ACTIVITIES

A. Kútten Ekkóóch Kapas

Mei wor ekkóóch kapas faan. Kopwe satoni nee kútta me nón eei pwóór.

PIIK               PEKKUS               PECHEEMW
PWENNI         CHANGETÁ           KOSE
KUNIING        TITTIN                  NEMENI
TÚMWÚNÚ

B. Mei wor ekkóóch sentences faan mei fis nón ewe story. Kopwe atettenni usun me nón ewe story.

1. Ewe piik aa nikessássááfetán nón tittin we.

2. Ewe kuniing aa ássifetán wóón ewe fénú aan kút anan mwéngé.

3. Ewe piik aa kechiw.

4. Ewe kúniing aa eréni ewe piik pwé aa men feiééch.

5. Ewe kuniing aa amáángngawa ewe piik.

C. Kopwe nengeni ekkeei kapas re nómw wóón peniemwáánum, kaa ari ngeni ekkeei kapas re nómw wóón peniefeefinomw, menni nein epwe weneiti.