written by Alvios William
designed and illustrated by Donald L. Buchholz

Nóómw, nóómw aramasan ekkei ruu fénú Namoluk me Ocholuk iir mei chék áán fengenni eew machew. Fetán, fetán toori nón eew atun aa pwan wor eew pwérúk me wóón Ocholuk. Eei pwérúk aa fis fáán aseengesin áán néún ewe samwoonun Ocholuk we féépwún epwe fin pwúnúwan me neein ekkewe énúwénún Namoluk me Ocholuk. Iwe nón ena atun ekkewe énúwénún Namoluk raa ettá Ocholuk pwe repwe pwan fééri aar we pwerúk. Néún ewe samwoonun Namoluk emén áát mei fitiir. Iwe fansoun áár raa pwépwpwérúk ekkewe énúwénún Namoluk nge ewe féépwún aa toowu pwe epwe ne kefin pwúnúwan.

"Paapa!" ewe féépwún aa kééri seman we. "Kone éúkaanó eei pwérúk pwún waa kúnékún pwúnúwei."

"Kéwúúnó!" ewe samwoon aa apasa. "Oune en me nó nón neeniemi pwún nei eei nengngin aa kúnékún pwúnúwan."

Iwe ekkewe énúwénún Namoluk raa niwiniiti Namoluk nge néún ewe samwoon we ese chúwen fitiir. Aa nómwónó reen pwúnúwan we wóón Ocholuk.

Fetán, fetán nón eew ráán ekkewe énúwénún Ocholuk raa mwiich fengen iwe raa pwúngú pwe repwe ne niienó ewe énúwénún Namoluk pwún raa men nanawóóiti áán we pwúnúweni ewe niaééchún Ocholuk. Iwe, nón eew ráán raa kan mwimwmwiich nón ewe aan nge ewe énúwénún Namoluk aa pwereto.

"Inaai," ekkewe énúwén raa efiimas fengen neefiineer. "Oune meen pwe sipwe ne wesewesen ni ena nóku."

Iwe atun atewe aa pwereto toori ewe mwiich, raa turufi iwe raa ichchii etiw futukan me wóón chúún. Mei wor emén me neein ekkewe áát aa fókkun kechiweiti ewe énúwén reen aan we fókkun tongeei. Iwe aa ioni-fengenni chúún kewe me futukan iwe aa nó peiaseni.

Fetán, fetán ina epwe ekkóóch ráán me mwúrin nge aa war eew mwiich seni Namoluk. Eei mwiich re uwowtá anan ewe énúwén mwéngé me reen saman we samwoon. Iwe nupwen áár raa toori Ocholuk nge ewe énúwén e peiaseni ewe énúwénún Namoluk aa apworausa ngeniiir pworausan ate we áán ekkewe énúwénún Ocholuk we raa niienó. Ina chék nge ewe mwiich seni Namoluk aa niwiniiti Namoluk. Atun áár raa toori Namoluk, raa apworausa ngeni ewe samwoon meeta we aa fis ngeni néun we. Ewe samwoon fókkun soong iwe aa emwiicha-ffengenni aramasen Namoluk meinisin.

"Nei we énúwén aa má," ewe samwoon aa apasa. "Úwaa fókkun soong. Iwe, meinisin áámi oupwe amonnaatá pisekimi pisekin maaun pwe neesor sia nó maauneei chóón Ocholuk."

"Samwoon, mei wor ekis meefiei," emén ekkewe mwáán aa úútá. "Amwusaanó tipis samwoon me pwan áámi chóón nón eei mwiich. Meefiei eei úwaa mochen úpwe tungór ngeni kemi meinisin pwe sisapw atapwanapwan nón áách mwékútúkút. Oupwe ne nikitaanó ekiekin eei napanap aa fis ngeni kich. Ngaang úpwe ne angaang wóón. Iká ese tawe reei, iwe, ina atun áámi oupwaapw ekieki meet sipwe féér ngeni." Chóón ewe mwiich raa tipeeew ngeni meeta we ewe emén aa apasa.

Eei mwáá e tungór pwe epwe angaang akkoomw wóón ewe napanap itan Ocheinam. Ocheinam aa nó nón imwan ewe aa asori néún eew nóó itan Nóóinam. Nóóinam aa wareto iwe Ocheinam aa ékkúnééw pwe epwe nó ataai ewe fénú Ocholuk. Aa pwan úreni pwe esapw ataai neenien ewe énúwén e peiaseni futukan ate we kewe. Iwe ewe nóó aa nó ataai ewe fénú Ocholuk. Ewe chék énúwén e peiaseni néún ewe samwoonun Namoluk we tiwenóón chék me neein chóón Ocholuk ese máánó. Nge meinisin aramasen Ocholuk raa máánó. Iwe, seni ena atun chóón Namoluk me Ocholuk rese chúwen machewen-ffengenni eew machew.