Ewe Maaun Áán
Maan Súúsú Me
Maan Téété

written by Alvios William
illustrated by Gúe
 

Aa fis ewe maaun neefiinen maan súúsú me maan téété. Eei maaun ese fókkun fat epwe meeta pwopwutáán.

Maan súúsú raa unus meinisin pwún néúúr we samwoon itan Iken aa emwicheer. Néúúr we samwoon Iken aa ngeni emén me emén sókkun maan wiisáán. Aa einetiir ekkóóch repwe maaun neepwin, ekkóóch neeráán. Ekkewe mei enúwen fetin inisiir repwe maaun neeráán pwún repwe operi chéén irá pwún rete pwá. Ekkewe mei chón repwe ááni neepwin pwún maan téété resapw kúneer. Ekkewe mei par, mei orench, mei ón repwe ááni neekunión pwan neesossoor atun áán akkar epwe ne téétá pwan tupwunó. Ina atun aa mwurinné ngeniir pwún raa usun énúwen mwiriitupw. Ekkewe mei pwech repwe ááni een atun aa chómmóng kuchu mei pwech fáán nááng pwún maan téété resapw kúneer me nón kuchu mei pwech.

Naion ii néún maan téété samwoon pwún e fókkun pwara.  Naion aa pwan emwicha ffengenni maan téété pwún aa pwan ngeni emén me emén sókkun maan aan angaang. Naion aa úreni kaáttu pwe ii epwe maaun me wóón pwún nge epwe pwan op wóón irá pwe atun machchang raa sootiw wóón irá, nge epwe mweteriir pwún epwe ocheer.

Masetá neesor aa pwopwutá ewe maaun. Fáán nááng ese chiwen pwáánó reen chóówe machchang. Wóón pwuán ese chiwen kuch chóówe maan téété reen chómmóngeer.

Meinisin ekkewe maan súúsú me maan téété raa pwopwutá ne fiu nge Péúté ese fiu. Aa chék nikkawúrú menni peekin epwe wiin ina ena epwe fiti.

Fetán, fetán maan súúsú raa wiin seni pwopwutáán ewe maaun toori neanowas. Ina atun Péúte aa changetaá neein ekkewe maan súúsú pwe aa fitiir ne fiu ngeni ekkewe maan téété. Iwe seni mwúrin neanowas ekkewe maan súúsú raa fókkun ménúúnú. Pwopwun áár raa ménúúnú pwún rese toongeni sootiw wóón irá pwún chóówe áán káttu raa chék sousou wóón  irá. Aa ménú péúúr ne ákkáás chék. Fansoun áán maan súúsú we raa kuf, Péúte aa sootiw wóón pwún. Iwe ekkewe maan téété raa kitiriiti pwe repwe ne wesewesen émwúchchú. Iwe Péúte aa erá pwe repwe witiwit mwo pwún epwe úreniir.

"Oupwe attona mesei pwe mei weewe ffengen me mesen nakkich. Nakkich me ngaang pwiipwi, ina pwata ousapw niiei," Péúte aa cháácháári ekkewe maan téété. Ekkewe maan téété raa attona mesen nakkich attona mesen Péúte mei chék weewe ffengen. Iwe raa erá pwe mei pwúng. Ina atun raa nikitaanó Péúte. Péúte aa fiti maan téété me fiu ngeni ekkewe maan súúsú.

Fetán, fetán nekunión nge maan súúsú raa pwan wiin pwún ekkewe maan téété raa peen áár echik. Maan súúsú rese meefi áár echik pwún iir mei chék áás nge ochooch nikken me nóóng me nón asepwaan. Atun áán maan súúsú we raa wiin Péúte aa pwan changetá neeiir. Aa erá pwe ii nupwen áán aa attona fichii inisin ese mwo sókko seni inisin ekkewe machchang. Ii mei toongeni áás usun chék ekkewe machchang. Ina pwata aa súúseni ekkewe maan téété pwún esapw ii maan téété pwe ii maan súúsu. Iwe Péúte aa fiti maan súúsu ne maaun ngeni ekkewe maan téété. Iwe ekkewe maan téété ráá fókkun ningeringeriiti Péúte.

Fetán, fetán ewe maaun, maan téété raa pwan wiin. Péúte aa pwan changetiw pwe epwe ne pwan sootiw.

"Ngaang úse fókkun kinamwmwe reen áái eei tongeekemi pwún ngaang wesewesen emén chienemi maan téété," Péúte aa pwan úreni ekkewe maan téété.

"Súúnó!" ekkewe maan téété raa pwúchéér ngeni Péúte.  Raa fókkún mangngaweiti Péúte. Péúte aa fókkun resin amwusomwus nge rese chiwen mwochen áár repwe pwan sonongeni.

Iwe Péúte aa sááw reen áár we raa opwut. Aa sú aa changetá reen maan súúsú. Aa pwan úreniir pwe ii pwúngún pwe ii maan súúsú pwún mei wor péún áán epwe áás.

Ekkewe maan súúsú raa fókkun mángngaweiti. Raa tapweei pwe repwe ne awata. Iwe aa sú aa changetiw reen ekkewe maan téété. Ekkewe maan téété raa pwan tapweei pwe repwe pwan awata. Péúte aa sú pwe aa nó oponó. Ina pwata toori ikenáái meinisin maan repwe chék kúna Péúte me ekis raa tapweei pwe repwe awata.