written by Alvios William
illustrated by Deby Nakamura

Mei wor eew pwúpwpwúnú seni Chuuk re sukuun Hawaii. Eei pwúpwpwúnú re nómw wóón eew fénúwen nón Hawaii itan Honolulu. Mei wor néún eei eew pwúpwpwúnú emén áát emén nengngin.

Fansoun áán eei pwúpwpwúnú nónnómw Honolulu raa tungór pwe néúúr kewe semiriit repwe ne fiti sukuun. Iwe ewe chóón nemeni sukuun aa mwúút ngeniir. Aa úreniir repwe nó makkeei iteer reen ewe sense itan Tokiko. Itan ewe áát Ratopwun nge iten ewe nengngin Tamerina. Weesin áán Tokiko makkeei iteer kewe, aa úreniir pwe neesor repwe ne pwopwutá sukuun. Iwe Ratopwun me Tamerina raa kinisou ngeni Tokiko iwe raa niwiniiti imweer we.

Masetá neesor Ratopwun me Tamerina raa nó sukuun. Fansoun ekkewe semiriit meinisin raa nómw nón ewe ruumwmwen sukuun, Tokiko aa apasa:

"Ikenáái, mei wor rúwémén semiriit repwe keráán fitikich ne sukuun. Ekeei semiriit seni eew neeni nón Micronesia itan Chuuk. Áámi meinisin oupwe túmwúnúúr. Oupwe kan kukkunow ngeniir pwan aiti ngeniir nón áách eei neenien sukuun. Itan eei áát Ratopwun. Itan eei nengngin Tamerina."

Ratopwun me Tamerina raa sukuun nón ewe sukuun. Nón eew ráán Tokiko aa asukuuna ngeni néún kewe chóón sukuun sókkun maan. Raa káeé ngeni iteer pwan napanapan áár mwékútúkút fetán.

Tokiko aa ngeni ekkewe chóón sukuun chómmóng sókkopaaten pwuken maan repwe ánneááni. Ekkewe chóón sukuun raa men fókkun pwaapwa áár we raa sineei pworausen chómmóng sókkun maan.

"Neesor sipwe ne nó wesewesen katon napanapan ekkeei maan ouwa káeé ngeni iká fen anneááni pwórauseer me non néúch keei pwuk," Tokiko aa úreni néún kewe chóón sukuun.

"Nge meet sókkun pisek sikan uweei atun áách kan nó nón neenien maan?" Ratopwun aa ais.

"Mei chómmóng sókkopaaten mettóóch aramas rekan uweei," Tokiko aa pénúweni áán Ratopwun we kapas eiis. "Ekkóóch aramas rekan uwoou néúúr kámera. Ekkóóch rekan uwoou eneer mwéngé pwan únúmeer kónik pwún rete echik me mwochen ún kónik me nón ewe neenien maan. Kiich sipwe en me uwoou anach mwéngé, únúmach kónik, nge ousapw ménúúki néúmi pwuken mak me néúmi piin.

Masetá neesor, Ratopwun me Tamerina raa ammasowa eew pwotou taropwe ngeni rúwéféú uuch mei kuk pwan emén senieer iik mei firain. Raa pwan uweei ruu únúmeer núú. Tamerina mei chék chemeni néúúr pwuk me néúúr piin. Tamerina aa angei pisekin kewe iwe aa sáá ngeni ewe imwen sukuun.

Tamerina me Ratopwun raa chuuri ekkóóch chieneer kewe chóón sukuun me nón ewe aan. Iir mei pwan uwoou pwotoun mwéngé pwan néúúr pwuk me neuur piin. Ekkewe chóón sukuun raa men fókkun pwaapwa reen áár we sáái.

Nupwen raa toori ewe imwen sukuun, raa chék witiwit pen ewe asam pwun Tokiko e mang. Ekkóóch ekkewe chóón sukuun raa kan eiis fengen neefiineer iká mei wor neeiir aa piin nó nón ewe neeni. Iwe iir meinisin re erá pwe ese wor ee e toori ewe neeni. Atun áár pwópwpwóraus fengen neefiineer nge raa kúna Tokiko pwe aa pwereto.

"Neesor annim sense," ekkewe chóón sukuun raa kapwong ngeni Tokiko.

"Neesor annim áámi meinisin, Tokiko aa kapwong ngeniir. "Ouwa monnetá áách sipwe ne nó?"

"Ewer!" raa kéétá.

"Iwe, oune kiito meinisin pwún sipwe sineei ié ese war me ié mei war," Tokiko aa úreniir. "Sipwe ne fetán nge ese wor epwe imwúúnó wóón áán fetán. Sipwe chék ááni eew fetán. Ousapw etikaanong péúmi nón titin ekkeei maan pwún oute feiengngaw."

Fansoun raa toori ewe neenien maan, raa kúna chómmóng sókkopaaten maan. Raa eiis chómmóng kapas eiis ngeni Tokiko. Tokiko aa fókkun pwaapwa áán epwe pénúweni áár kewe kapas eiis. Ekkewe chóón sukuun raa fókkun pwaapwa. Raa makeei iten ekkewe maan re kúna. Ekóóch raa pwan chúngaaniir.

Neanowas, Tokiko aa erá pwe repwe ne mwéngé pwún raa echik. Iwe raa móóttenó fáán efóch irá mei mwón iwe raa mwéngé aneer kewe mwéngé.

Ratopwun me Tamerina raa mwéngé aneer kewe uuch me iik pwan ún únúmeer kewe núú. Ekkewe semiriiten Hawaii re mwéngé rais, ochooch chukó. Iir mei pwan uwoou ocháár féún irá.

Mwúrin áár raa wees me mwéngé, Tokiko aa úreniir pwe pwokiten neesor Ráánin-ammon, nón Sárin-fáán oupwe makkeei áámi ripwoot. Oupwe en me apworausa meet ouwa kúna me sineei seni áách eei saai.

Ikkeei ekkóóch áán ekkewe semiriit repwoot.