Eew Tuken Ammóót

written by Alvios William
illustrated by Deb Nakamura

Nón eei mwúún Merika, aa wor ekkóóch kómpeni raa toonong nón Chuuk. Pwopwun aar toonong pwún repwe kamé ammóót seni aramasen Chuuk. Ammóót aa éúcheá pwokiten ekkewe kómpeni raa toongeni féér pwachen, nááná iká ieriing seni ammóót.

Chómmóng aramasen Chuuk raa améémé ammóót nón fansoun aa suuk ngeni aramas aar repwe ne tu ammóót.

Nón eew atun aa pwan suuk ngeni aramas aar repwe ne pwan amééme ammóót. Mei wor emén mwáán aa pwan améémé néún ammóót. Nón ewe atun ese mwo wor mwoota wóón Chuuk. Waaffétún ina sein nón ewe atun.

Ewe mwáán aa tukeni néún kewe ammóót nón eew tuken taka. Aa ekietá wóón waan we waaffétún pwe epwe ne nó améémé Moen. Wáán we waa mei chék kúkkún. Úkúúkún chék ii me néún we tuken ammóót aar repwe téétá wóón.

Iwe ewe mwáán aa fétún ngeni Moen. Nupwen aan féffétún neemataw, aa sáreiti eew ráán. Wóón sáát aa pwan nóónótá. Ekkewe nóó raa nunong nón wáán we.

Iwe ewe mwáán aa nóniinen pwún epwe ne kokonó waan we.

"Meet eei úpwe fééri pwe epwe pánetá wáái eei?" ewe mwáán aa ekiekii. "O! Iká pwe ú ekietá nei eei tuken ammóót wóón afarei, wáái eei esapw kokotiw pwún choun eei tuken ammóót epwe nómw wóói. Ngaang úpwe chow nge wáái eei epwe ne pán."

Iwe ewe mwáán aa ekitiweei ewe tuken ammóót pwe aa mwáreei wóón afaran. Iwe aa pwan fétún, fétún nge wáán we ese mwo pánnetá pwe epwe ne fen kokotiw reen ewe nóó.

"O!" aa pwúchéér. "E pwe ne kokotiw wáái eei." Aa fókkun núwokkus iwe aa oturaanó neeset néún we tuken ammóót.

Atun áán we aa oturaatiw ewe tuken ammóót, waan we aa tekiaatá seni sáát. Ewe mwáán aa netiw nón ewe sáát aa kúna néún we tuken ammóót aan aa mwootiw nón ewe mataw. Aa katon, katon toori aan ese chúwen kúna ewe tuuk. Ina atun aa nóniinen pwún ese chúwen kúna.

"O!" aa erá. "Neesor úpwe niwiniiti neei naan tuken ammóót. Úpwe angeei iká pwe aa weesinó eei asepwáán."

Iwe ewe mwáán aa ekiekii pwe epwe ne esissinna ikewe e oturaanó ie néún we tuken ammóót.

Iwe aa angeei aan we taun e rii ngeni mékúran aa riietá wóón aan we akkeen. Iwe aa netiweei awenewenen ikewe ie e oturaatiw me ie ewe tuken ammóót. Aa angeei ewe akkeen mei riiriitá ewe taun wóón. Aa netiweei awenewenen ewe tuuk iwe aa aúwetá ewe akkeen neepeekin wáán we iwe aa riienó.

Ewe mwáán aa niwiniiti fénúwan we. Masetá neesor aa niwiniiti ewe neeni pwe epwe angeei néún we tuken ammóót nge ese chúwen kúna.