written by Chirano Cheipot
illustrated by Deby Nakamura

Sia men fokkun pwaapwa are epinúkúnúk kiich chóón chuuk pwokiten ese wor reech ekkewe ménún neeman mi efeiengngaw.  Ese wor Naion me taiker ika fen pwan ekkewe ekkóóch sokkun maan mei toongeni efeiengngawa manawen kiich aramas.  Sia fokkun feiéch pwokiten ekkewe sókkópaten ménún efeiengngaw ese fokkun wor reech nóón fénúach chuuk.  Tiwenoon chék ekkewe ménún nóón sáát.  Mei pwúng pwe anikitor mei wor nóón ewe fénú Panaw.  Ekkóóch ekkewe fénú mii wátte me nóón chuuk, piik ina ákkáewin maan watte.  Nge nóón ekkewe ekkóóch nakkich ina wattenóón.

Meet sókkun ménún neeman ekon watte me nóón fenuwom?  Mii wor eew sókkun maan nóón fénúwach keei nóón chuuk.  Ewe emén maan itan nitoupach mi ónóón usun chék kúween.  Een mei kúkkúna ei sókkun maan itan nitoupach?  Nitoupach rekan sou nónnómw nóón iimw.  Raa men sou téé fétán chék wóón etiip me tenchoon imwach kewe.  Ina neenieer pwún rekan sou ocheii ekkewe kúkkún maan sia men oputeer me nóón imwach kewe.  Choowe án nóóng me nikken.  Nitoupach raa men fokkun tipemmóng nge raa men chék pwan aninnisééch ngeni kiich.  Ákkáeewin raa nónnómw reech nóón imwach kewe, aruuen rekan pwan sou ocheei ekkewe kúkkún maan chóón fiiu ngeni kiich.

Een em sineei ekkewe maan iteer nitoupach?  Áái núkú pwún een meei sineei ekkeei maan.  Raa men fokkun sou akurang pwan nouommóng néúweer.  Usun chék pwan néúwen ekkewe nipuároch.  Tittipach chék nge ekkewe kúkkún maan rese toongeni néuwemmóng.  Neepwin ina atun sia rongorong aar méngúúngú.  Kiich mi pwan rongorong me ekis toowaaw.

Ika pwe ke túnúúw nisamwúttúúr, iir mi chék pwan toongeni fetán.  Meei pwan toongeni máár sáfáán.  Úkún we e túnúnó mei pwan toongeni mwékútúkút nóón ekis fansoun.

Ekkewe nitoupach, iir meei sókuun usun chék pwan ekkewe ekkóóch ménún neeman.  Sokunnuur rekan nómw nóón pwangen are sáttin nóón irá me nóón imwach kewe.

Mei wor ekkóóch ekkewe kúúen nóón chuuk usun chék ekkewe nitoupach.  Mei wor ekkewe mi chóchchón.  Raa watte seni ekkewe nitoupach, nge rese pwan chómmóng usun ekkewe nitoupach.  Ekkewe mei chóchchón rese pwan toongeni nónnómw nóón iimw.  Raa chék nónnómw núkún iimw are pwan wóón ekkewe faaw ika fetin.  Meni ina pwopwun sise konnien efichiir usun ekkewe nitoupach.  Ekkewe kúúen me nitoupach rese men pwan afeiengngaw.  Raa men fokkun aninnisééch ngeni kiich.  Rese pwan kúk are pwan poisén.  Raa men fókkun fesir.

Sia men fokkun kinissou ngeniir reen aar angaangééch.  Sipwe fokkun chechchemeni pwe sisapw efeiengngaweer are urumwotiitiir.  Sipwe túmwúnúúr reen aar fokkun angaangééch ngeni kiich.

Sisapw fokkun ekieki pwe ekkewe nitoupach ese wor namwoteer ngeni kiich.  Fokkun chómmóng aar aninnis ngeni kiich.  Iir raa toongeni ékúkkúnaanó nikken me nóóng.  Ekkewe chóón fiiungeni kiich.  Nikken me nóóng chóón uweaato semwen ngeni kiich aramas.  Nitoupach raa nii ekkewe maan raa uwato reech samaaw.

Meet sipwe ngeni ekkewe nitoupach pwe niwiniir ren aar angaangééch ngeni kiich?