adapted by Alvios William
illustrated by Ioanis Santos

Mei wor emén áát itan Pwáás e kan nónnómw nón ewe sóópw Winipis. Aan Pwaas angaang e kan chék túttúúkken iteiten ráán. Pwáás aa men sou atupwu aramasen Winipis. Inan me seman kewe raa fókkun chipwang nee fóós ngeni Pwáás pwe epwe úkútiw me túkken nge ese toongeni aan epwe ekieki meet we re ereni pwe esapw fééri. Aa fis pwe aan Pwáás minan atakirikir aan we kan chék asona chóón ewe neeni Winipis.

Pwáás ii chóón sukuun. Iteiten ráán, mwirin sarin sukuun, Pwááse ese kan niwiniiti imwan we. Fáán chómmóng inan we e kan asori nge aa péppénúwenong me neeset.

Nón eew ráán, Pwáás aa pwan war chék me sukuun iwe aa pwan nó túkken.

"Oo!" Pwáás aa pwúpwpwúchéér. "O cheeriei pwe eei pokó epwe ne kúúwei. Oo, o mwittir, o mwittir pwún úpwe ne feiengngaw."

Iwe, meinisin mwáán me énúwénún ewe sóópw Winipis raa sááwu faan okuur kewe mechá reen Pwáás nón ewe sáát pwe repwe sinesi ewe pokó.

"Ifaai ena pokó?" Ekkewe mwáán raa ais. "Sááto ikeei pwún kote feiengngaw."

"A, a, aa, aaa." Pwáás aa takiriir, "Ú chék asona kemi."

Ekkewe mwáán raa niwinnong wénifénú nge raa fókkun mángngaweiti Pwáás

Fetán, fetán nón eew ráán Pwáás aa pwan nónnómw iwe aa kan ekieki pwe epwe ne pwan asona chóón Winipis.

"Iei, ina repwe ne ménúúkóónó áái we asonaar." Pwáás aa kan ekieki. "Iwe úpwe ne pwan asonaar." Iwe, nón ewe ráánin aa pwan nó túkken.

"Wew neé." Pwáás aa pwan pwúpwpwúchéér. "Oo, o cheeriei pwe úpwe ne feiengngaw pwún eei pokó epwe ne kúúwei. Ou mwittir pwún epwe ne tooriei."

Iwe, ekkewe mwáán me énúwénún Winipis raa pwan kitiriwu fáán ókuur kewe tóón pwáápwá pwe repwe tóói ngeni ewe pokó.

"Ifaai, ifaai ena pokó?" Ekkewe mwáán raa ais. "Súúto ikeei pwún kote feiengngaw nge áám úpwe posuposuu-ngeni ena pokó ókum keei."

"A, a, a aa," Pwáás aa fókkun takir. "Mwaa pwata me iei kerimangemi. Iaa piin asona kemi akkoomw, iei iaa pwan chék asona kemi. A, a a, aa," Ekkewe mwáán raa fókkun soooong. Raa en me niwiniiti imwan nón aar fókkun soong.

Fetán, fetán ee nón eew ráán Pwáás aa pwan nó túkken. E chiwen túkken nge aa war emén pokó mei fókkun wátte. Ewe pokó aa tapweei Pwáás pwe epwe kúú. Iwe Pwáás aa kitipéppé ne sú.

"Wew nee, wew nee!" Pwáás aa pwúpwpwúchéér. "Oo, o cheeriei pwún eei pokó epwe ne kúúwei. Oo o mwittir, mwittir oo."

"Iééna mwaa?" Ekkewe re Winipis raa ais. "Nón ekkewe fansoun Pwáás e chék fókkun asona kich. Itá ié na epwe etiwu epwe pwan sononó reen atena."

Pwáás aa fókkun resin pwúchéér ne kékké pwe repwe anisi nge ese wor e éúsening ngeni meeta we e ááni pworaus. Iwe ewe pokó aa mweteri efóch tangan Pwáás iwe túnúwénó. Seni ena atun Pwáás aa okuwok okuwokun fetán pwún aa chék efóch tangan.