Angaangan non Famini

drawings by Iwish Mathias
text by Alvios William

Iei aan Chiro we famini.

Iten seman Chiro, Siro.

Iten inan Ansina.

Iten feefinan kewe Meriam me Merini.

Siro emén sou-annuk. E kan angaang nón aan we oofes seni Sárinfáán toori Enimu. Nón Ammón Siro aa kan kinikin maai.  Nón ekkóóch Ammón aa kan nó attaw.

Ansina e kan enimenim nón pwan núkún imweer we. Ii e kan túmwúnú Meriam pwún Meriam mei chúwen kúkkún. Ansina e kan pwan kuk eneer mwéngé.

Merini e kan ánisi inan we nee soopw.

Merini e kan pwan kuk eneer mwéngé.

Merini e kan pwan akunowu Meriam.

Chiro aa men mwochen ánisi seman we ne angaang. E kan fiti nee nó attaw. E kan pwan fiti nee nó kinikin maai. Chiro e kan pwan ánisi seman we ne nó atake.

Chiro aa kinikin maai. Seman we aa otoot fáán aar kewe maai. 

Aa pékú ekkewe sáán mei tééki wóón aar kewe maai.

Aa pwan oteei ekkewe fetin seni pwopwun ewe maai.

Siro me Chiro raa nó attaw.

Raa ameresi aar we cheew nón ewe sáát.

Chiro aa túúnó nón ewe sáát. Aa kúna ekkewe iik nón ewe cheew. Chiro aa niápeni emen iik mei wátte wóón okun we mechá.

Siro me Chiro raa fókkun niapeni chómmóng iik non ewe ráánin.   Raa waanó nón ewe neenien améémé iik. Raa uwei ekkóóch pwe eneer nón imweer we.

Ansina me Merini raa kukkunow nón ewe pi.

Merini e kan amóóta Meriam nón ewe pi.

Meriam aa kan fókkun takir.

Aa kan tukeei ewe pi nón péún iwe aa kan minaatá wóón mékúran.

Merini aa rong úngúúngún mwoota.

Merini aa kéérí inan we pwe epwe katon menni ewe mwoota. 

Ansina aa kúna ewe mwoota.

Aa itini nge aa kan takir.

Meriam aa pwan kúna ewe mwoota. Meriam aa fókkun kan pwaapwa. Aa kan pwan itini ewe mwoota.

Merini aa esinna Chiro me wóón ewe mwoota.

Chiro aa kan eitiéta péún nge kapwong ngeni

Merini me Meriam. Chiro aa kan epiietá niapan we iik.

Ansina aa waawu eew waspeesin reen Chiro. Siro aa isenaanong ekkewe iik nón ewe sepi. Siro me Chiro raa eki fengenni ewe waspeesinin iik. Raa waanong ewe sepien iik wóón ewe pi.

Ansina aa kuku ekkewe iik.

Merini aa kemwech Meriam.

Siro me Chiro raa nó túútú.

Siro me Chiro raa móttiw nón ewe kieki. Merini me Meriam raa pwan móttiw nón ewe kieki. Ansina áa waato ekkewe iik reer. Iir meinisin raa mwéngé. Raa fókkun pwaapwa reen annéén eneer kewe mwéngé.